Golaha Wasiirrada Xukuumadda Jamhuuriyadda Federaalka Soomaaliya oo maanta yeeshay kulankoodii toddobaadlaha ahaa, ayaa ansixiyey heshiis u dhexeeya dowladaha Soomaaliya iyo Uganda oo ku saabsan ciidamada Uganda ee ka

Warbixinta maanta ee ka soo baxday kulanka Golaha Wasiirrada Xukuumadda Federaalka Soomaaliya ayaa lagu soo bandhigay tallaabooyin muhiim ah oo la xiriira horumarinta amniga, dhaqaalaha, iyo hannaanka dastuurka ee dalka. Kulanka oo uu guddoomiyay Ra’iisul Wasaare Xamsa Cabdi Barre, ayaa sidoo kale lagu ansixiyay heshiiska u dhexeeya dowladaha Soomaaliya iyo Uganda, kaas oo quseeya howlgalka ciidamada Uganda ee ku sugan Soomaaliya. Heshiiskan ayaa qayb ka ah dadaallada wadajirka ah ee lagu xoojinayo iskaashiga labada dal si loo adkeeyo amniga Soomaaliya iyo gobolkaba. Intii uu shirku socday, waxaa sidoo kale lagu gorfeeyay arrimaha la xiriira Shirweynaha Daraasaadka Soomaaliya, kaas oo ah barnaamij muhiim ah oo lagu xoojinayo cilmi-baarista iyo aqoonta dalka, iyo warbixino la xiriira horumarinta dhaqaalaha iyo dhammeystirka Dastuurka. Golaha Wasiirrada ayaa isku raacay in heshiiska Soomaaliya iyo Uganda uu muhiim u yahay hawlaha amniga, iyadoo sidoo kale kor loo qaaday doorka Soomaaliya ee hannaanka wada-shaqeynta gobolka. Kulankan ayaa muujinaya sida ay Xukuumaddu ugu heelan tahay hagaajinta nidaamka dowladnimada iyo hormarinta adeegyada bulshada. Golaha Wasiirrada Xukuumadda Federaalka Soomaaliya ayaa maanta ansixiyey soo jeedinta Wasaaradda Amniga Gudaha ee ku aaddan magacaabista Agaasimaha Guud ee Hey’adda Socdaalka iyo Jinsiyadda Soomaaliya. Xilkaas waxaa loo magacaabay Mudane Mustaf Sheekh Cali Dhuxulow. Magacaabistan ayaa qayb ka ah dadaallada Xukuumadda ee lagu xoojinayo hay’adaha amniga iyo maareynta socdaalka dalka, si loo dardargeliyo howlaha muhiimka ah ee hey’addu u qabato bulshada iyo guud ahaan qaranka. Golaha Wasiirrada ayaa sidoo kale ku booriyey Agaasimaha cusub in uu dardar geliyo shaqooyinka hey’adda, isaga oo ka shaqeyn doona sidii loo horumarin lahaa adeegyada ay hey’addu bixiso, loona adkeyn lahaa maamulka socdaalka iyo jinsiyadda dalka.